Hökümetde Sosial-demokratik partiýa wekilçilik edýän Şweýsariýanyň içeri işler ministri Alen Berse ýekşenbe güni ýurduň prezidenti hökmünde işe başlady. Ol 2023-nji ýylda prezident ygtyýarlyklaryny ministrlik wezipeleri bilen bir wagtda ýerine ýetirer diýip, TASS habar berýär.
Prezident saýlawlary 2022-nji ýylyň 7-nji dekabrynda parlamentiň iki palatasynyň bilelikdäki ýygnagynda geçirildi. Alen Berse Daşary işler ministri Inýasio Kassisiň ýerine prezident boldy. Syýasy giňişlikdäki bu üýtgeşme Şweýsariýanyň daşary we içerki syýasatyna hiç hili täsir edip bilmez, sebäbi Federal Geňeş (hökümet) iň möhüm meseleleriň hemmesini bilelikde çözýär.
Berse 1972-nji ýylyň 9-njy aprelinde Şweýsariýanyň günbataryndaky Fribur kantonynda dünýä indi. Onuň ykdysadyýet boýunça doktorlyk derejesi bar. Ol 2012-nji ýyldan bäri hökümetde işleýär, Içeri işler ministrligine (federal departamente) ýolbaşçylyk etmek bilen, sosial üpjünçilik, saglygy goraýyş we medeniýet ugry boýunça işleri alyp barýar. Berse 2018-nji ýylyň dowamynda hem prezident bolup işläpdi we bu wezipä täzeden saýlanmagy onuň syýasy terjimehalyna ikinji gezek ýazyldy.
