Ýakynda Gazagystanyň prezidentiniň nobatdan daşary saýlawlarynda ýeňiş gazanan Kasym-Žomart Tokaýew 26-njy noýabrda, şenbe güni döwlet baştutanynyň wezipesini resmi taýdan ýerine ýetirmäge girişdi. Dabaranyň geçirilen ýeri bolan Garaşsyzlyk köşgünde çärä hökümet agzalaryndan, parlamentiň iki palatasynyň deputatlaryndan we beýleki hökümet edaralaryndan ýüzlerçe myhman, şeýle-de, respublikanyň birinji Prezidenti Nursultan Nazarbaýew gatnaşdylar.
Tokaýew öz çykyşynyň başynda 2022-nji ýylyň Gazagystanyň halky üçin aýratyn möhüm bolandygyny, respublikanyň özüniň bolsa ösüşiň täze eýýamyna aýak basýandygyny belledi. Döwlet baştutany hökümet tarapyndan badalga berlen giň göwrümli özgertmeleriň düýpli özgerişlikleriň başyny başlandygyny aýan etdi. Aýratynam, konstitusion özgertmeler amala aşyryldy, döwlet durmuşynyň ähli ugurlary hemmetaraplaýyn täzelendi.
