Meşhur amerikan repçisi Kanýe Uest 2024-nji ýylda ABŞ-nyň prezidentligine ýene-de dalaş etmäge hyýallanýar. Bu barada ol X17 Online wideoportalynyň ýaýlymynda mälim etdi.
Sazanda: «Maýlo Ýannopulos bilen tanyş boluň, ol meniň prezidentlik kampaniýamyň üstünde işleýär» diýdi. Şondan soň oňa operatoryň takyklaýjy sowaly berildi, ýagny ol Uestiň ABŞ-nyň prezidentligine dalaşgär boljagyny-bolmajagyny sorady. Rep-ýerine ýetiriji: «Hawa, şeýle» — diýip sada jogap berdi.
New York Post gazetiniň berýän maglumatyna görä, Ýannopulos ozal ABŞ-nyň Kongresiniň Wekiller Palatasynyň agzasy Teýlor Griniň (Jorjiýa ştatyndan respublikaçy zenan) toparynda işläpdir. Şeýle-de, ol sagçy Breitbart portalynyň redaksiýalarynyň birine hem ýolbaşçylyk edipdir we 2017-nji ýylda «öjükdiriji arzalardan» soň ol ýerden işden çykmaga mejbur bolupdyr.
Uest 2020-nji ýylda hem ABŞ-nyň prezidentligine dalaş edipdi. Saýlawlarda ol «Doglan gün partiýasy» Birthday Party-ä («doglan günüň şanyna bellenýän agşam» diýip hem terjime edip bolar) wekilçilik etdi. Repçi saýlaw kampaniýasyna öz serişdesinden 12 million dollardan gowrak pul sarp etdi. Onuň köp bölegi — 7,5 milliony — sazandanyň adyny dürli ştatlarda saýlaw býulletenlerine girizmek üçin zerur töleglere gitdi. Netijede Uest 60 müňden gowrak adamyň goldawyny aldy. Iň gowy netijäni ol Tennessi ştatynda gazandy — sazanda üçin saýlawçylaryň 10 müňden gowragy ses berdi, ýagny sesleriň umumy sanynyň 0,3% -ni aldy.
