Nauşnikde aýdymy gaty sesli diňlemek ýa-da konsertlere ýygy-ýygydan barmak eşidiş ukybynyň ýitmegine sebäp bolup biler. Muny ABŞ-dan, Şwesiýadan we Şweýsariýadan halkara alymlar topary anyklady. Gözleg BMJ Global Health ylmy žurnalynda çap edildi diýip, incrussia.ru belleýär.
Alymlar nauşnikde ýa-da konsertlerde gaty sesli aýdymy diňlemek bilen baglanyşykly soňky 20 ýylda geçirilen 30-dan gowrak gözlegi seljerdiler. Onuň netijesine görä, aýdymy howpsuz däl görnüşde diňlemek (sesiň güýçlüligi gurluşdaky iň ýokary derejeden 60% ýokary we konsertlere galmagaldan goraýjy gurluşlary dakmazdan gatnaşmak) nauşnikli ýagdaýlaryň 24%-ini, konsertli ýagdaýlaryň tas 50%-ini emele getirýär. Umuman alanyňda, saýlanan synaglara 20 müňe golaý adam gatnaşdy.
Seljerme 670 milliondan 1,35 milliarda çenli ýaş adamlaryň aýdymy gaty sesli diňlemek bilen eşidiş ukybyny ýitirmek howpuna sezewar bolýandygyny görkezdi. Gözlegi geçirijiler fon galmagaly bilen eşidiş ukybynyň hemişelik ýitmeginiň arasyndaky sebäp-netije baglanyşygyny görkezmediler, ýöne olar aýdymy gaty sesli diňlemegiň “eşidiş çäkleriniň üýtgemegi” bilen baglanyşyklydygyny anykladylar. Bu dikelmegi üçin ençeme ýyl gerek bolup biljek duýgur öýjüklere zeper ýetmegiň netijesinde bolýar.
“Bu kem-kemden bolýan hadysa, şonuň üçin meseläni birbada anyklamak aňsat däl. Siz wagtyň geçmegi bilen eşidiş ukybynyň hemişelik ýitmek howpuna sezewar bolup bilersiňiz” – diýip, awtoryň gözlegi we Günorta Karolinanyň lukmançylyk uniwersitetiniň ylmy işgäri, lukman Loren Dillard belledi.
