Dünýäde balygyň bikanun tutulmagyna garşy göreş boýunça global hereketler täze sepgitlere ýetdi – eýýäm 100-den gowrak döwlet bu ýaramaz hereket bilen göreşmek baradaky halkara şertnama gol çekdi. Bu barada BMG-niň Azyk we Oba hojalygy guramasy (FAO) habar berdi.
Port döwletleriniň çäreleri baradaky şertnama balygyň bikanun tutulmagynyň şeýle işler bilen meşgullanýan ýa-da ony goldaýan daşary ýurt gämileriniň porta girmeginden ýüz öwürmek ýoly bilen öňüni almak, saklamak we ýok etmek üçin ýörite işlenip düzülen ilkinji ýuridik taýdan hökmany halkara resminamadyr.
“Balyga sarp ediji isleginiň ýokarlanmagy we balykçylyk hem akwakultura gurşawynyň netijeli üýtgemegi balygyň global önümçiliginiň iň ýokary derejä ýetmegine getirdi. Şunuň bilen birlikde, bikanun balykçylyga garşy göreşi güýçlendirmegiň zerurlygy barha artýar” – diýip, BMG-niň Azyk we Oba hojalygy guramasynyň baş direktory Sýuý Dunýuý belledi.
FAO-nyň hasabyna görä, häzirki wagtda dünýäde balyk tutmak işiniň, takmynan, bäşden bir bölegi bikanun ýol bilen alnyp barylýar. Şeýle ýagdaý diňe bir kanuny balykçylyk pudagyna zyýanly täsir etmek we pudagyň işgärlerini eklençden mahrum etmek bilen çäklenmän, eýsem deňiz ekoulgamyna hem zyýanly täsir edýär. Mundan başga-da, FAO balygyň bikanun tutulmagyny ýok etmegiň BMG-niň Durnukly ösüş maksatlaryna ýetmek işinde üstünligiň açarydygyny belleýär.
