Häzirki wagtda Ýer ýüzüniň ilatynyň dörtden bir bölegi – 26% – howpsuz agyz suwundan peýdalanyp bilmeýär. Bu barada Bütindünýä Saglygy goraýyş guramasynyň (BSGG) we BMG-niň Çagalar gaznasynyň (ÝUNISEF) bilelikdäki hasabatynda habar berilýär diýip, forbes.kz belleýär.
Maglumatlara görä, 2020-nji ýylda dünýä ilatynyň 74%-i arassa agyz suwuna elýeterlidi. Deňeşdirmek üçin: 2000-nji ýylda howpsuz agyz suwuny adamlaryň 62%-i ulandy we sarp etdi. Şeýlelik bilen, analitikleriň belleýşi ýaly, asyryň başyndan bäri goşmaça 2 milliarddan gowrak adam arassa agyz suwuna elýeterli boldy.
Hapalanan agyz suwy 2019-njy ýylda diareýanyň dürli görnüşlerinden tutuş dünýä boýunça 1,5 milliondan gowrak adamyň aradan çykmagyna sebäp boldy. Şol ýyl arassa suwa mümkinçiligiň bolmazlygy 69 ýurtda mergi keseliniň ýaýramagyna sebäp boldy.
Hasabata görä, howanyň üýtgemegi arassa suwuň ýetmezçiligini güýçlendirýär – ekologiýa çökgünligi ýygy-ýygydan we güýçli gurakçylyga hem-de suw joşmalaryna getirýär.
Guramanyň hünärmenleri meseläni çözmek üçin dürli ýurtlaryň ýolbaşçylaryny suw üpjünçiligi ulgamyna maýa goýmaga we bu mesele boýunça döwletara koordinasiýany giňeltmäge çagyrýarlar.
