BAE-niň häkimiýetleri 28-nji sentýabrdan kowide garşy çäklendirmeleri gowşadar: kesel ýokuşanlar üçin karantin gysgaldylar, örtük düzgüni ýatyrylar, keselliler bilen gatnaşyk eden adamlar bolsa üzňelikde saklanmaga borçly edilmez. Gowşama hem ýurduň raýatlaryna, hem daşary ýurtly syýahatçylara degişli diýip, "The National News-e" salgylanyp, interfax.ru habar berýär.
"Ýapyk jemgyýetçilik ýerleriniň ählisinde, şol sanda kafelerde, restoranlarda, myhmanhanalarda, söwda merkezlerinde örtük dakynmak hökmany bolmaz. Örtük düzgüni hassahanalar, metjitler we jemgyýetçilik ulaglary üçin saklanar. Mundan başga-da, COVID-19 bilen kesellänler üçin karantin möhleti on günden bäş güne çenli azaldylar" - diýip, neşir ýazýar.
Özüňi üzňelikde saklamak ýagdaýy diňe koronawirus barlagyndan položitel netije alanlar üçin hökmany bolar.
Abu-Dabiniň ýaşaýjylary Al Hosn programmasynyň "ýaşyl statusy" görkezmegi üçin her 30 günden koronawirus üçin barlag tabşyrmaly bolar. Häzirki wagtda her iki hepdeden barlagdan geçmeli.
Uçarda örtük düzgüni baradaky çözgüdi häkimiýetler awiakompaniýalaryň garamagyna berdiler.
