Fransuz kompaniýalary 22-nji awgustdan başlap kömür we nebit ýaly gazylyp alynýan energiýa çeşmeleri bilen baglanyşykly mahabatlary ýaýradyp bilmeýärler. Degişli çäre klimaty goramak baradaky geçen ýylky kanunyň çäginde kabul edildi diýip, TASS habar berýär.
“Gazylyp alynýan ýangyjyň marketingi ýa-da ilerlenmegi bilen bagly mahabat gadagan” – diýlip, 2021-nji ýylyň 22-nji awgustyndaky kanunyň 7-nji maddasynda bellenilýär. Bu talap kanunyň tekstinde zyýanly zyňyndylarynyň derejesi ýokary bolan awtomobilleriň mahabatyny gadagan ediji bilen bile ýerleşýär.
Şeýle-de bolsa, bu kanun käbir kadadan çykmalary göz öňünde tutýar. Ýagny, gaz we ondan alynýan energiýa bilen üpjün edijileriň hyzmatlarynyň mahabatyna 2023-nji ýylyň 30-njy iýunyna çenli rugsat berilýär. Bu 2022-nji ýylyň ahyryna çenli hereket edýän gaz nyrhlaryny doňdurmak baradaky buýruk bilen baglanyşykly, soň kompaniýalar öz nyrhlaryny we hyzmatlaryny sarp edijilere mahabatlandyrmak üçin ýarym ýyl wagt alarlar. Şondan soň, köpçülikleýin habar beriş serişdelerinde we daşary mahabatlarda gazy mahabatlandyrmak hem gadagan ediler. Mundan başga-da, bu gadaganlyk ýangyjyň gazylyp alynýan görnüşlerine maýa goýumlaryň mahabatlaryna degişli bolmaz.
Zyýanly zyňyndylarynyň derejesi ýokary bolan awtomobilleriň mahabaty barada aýdylanda, kanuna laýyklykda, doly gadaganlyk 2028-nji ýyldan güýje girer. Häzirlikçe bolsa öz önümini Fransiýada ilerletmek isleýän awtoöndürijilerden öz mahabat roliklerine we habarlaryna welosiped, jemgyýetçilik ulaglary ýaly hereket etmegiň alternatiw usullaryny goşmak talap edilýär.
