Ispaniýanyň «Realy» bilen Germaniýanyň Maýn boýundaky Frankfurtynyň «Aýntrahty» çarşenbe güni UEFA-nyň Superkubogyny almak üçin duşuşarlar. Duşuşyk Helsinkidäki Olimpiýa stadionynda geçer we aşgabat wagty bilen 00:00-da başlanar.
Madridiň «Realy» Superkubok ugrundaky oýna Çempionlar ligasynyň ýeňijisi hökmünde gatnaşar. Turniriň final oýnunda ispan kluby 1:0 hasap bilen iňlisleriň «Liwerpulyndan» üstün çykdy. «Aýntraht» Ýewropa Ligasynyň ýeňijisi hökmünde çykyş eder. Aýgytlaýjy oýunda Germaniýanyň kluby Şotlandiýanyň «Reýnjersini» utdy. Duşuşygyň goşmaça wagty 1:1 hasap bilen tamamlandy, oýundan soňky penalti seriýasynda «Aýntraht» 5:4 hasap bilen ýeňiş gazandy.
