Dünýäde awiasiýa, kosmos we harby tehnikasyny iň uly öndürijileriň biri bolan Boeing amerikan konserni 2022-nji ýylyň ikinji çärýeginde täjirçilik uçarlarynyň üpjünçiligini geçen ýylyň degişli döwri bilen deňeşdirilende, 53% ýokarlandyrdy. Kompaniýanyň metbugat relizinde habar berlişi ýaly, ol aprel – iýun aýlarynda bazara bir ýyl ozalky 79 uçara garşy 121 uçar iberdi diýip, interfax.ru belleýär.
Birinji ýarymýyllyk üçin üpjünçilik 2021-nji ýylyň ilkinji alty aýyndaky 156 uçar bilen deňeşdirilende, 216 howa gämisine deň boldy.
Boeing ikinji çärýek we ýarymýyllyk üçin hasabaty 27-nji iýulda neşir eder.
FactSet tarapyndan sorag edilen analitikler kompaniýanyň düzedilen ýitgisini geçen ýylyň aprel – iýun aýlaryndaky her paýnama üçin 60 sentden her paýnama üçin 7 sente çenli azaltmagyna garaşýarlar. Boeing-iň girdejisi bir ýyl ozalky 17 mlrd dollara garşy 17,5 mlrd dollar derejesinde bolar diýlip çaklanylýar.
Kompaniýanyň paýnamalarynyň bahasy sişenbe güni ABŞ-daky söwdanyň dowamynda 8% ýokarlandy. Ýylyň başyndan bäri kompaniýanyň kapitallaşdyrmasy 27% pese gaçdy, S&P 500 indeksi bu döwürde, takmynan, 19% ýitirdi.
