Dünýädäki iň uly kompaniýalaryň ýolbaşçylarynyň 75%-den gowragy 2022-nji ýylda dünýä ykdysadyýetiniň gowulaşmagyna garaşýar. Bu soňky 10 ýylda iň optimistik çaklama diýlip, PwC konsalting kompaniýasy tarapyndan geçirilen pikir soraşmanyň netijesinde aýdylýar. Bu barada TASS habar berýär.
“Soraga gatnaşan ýolbaşçylar geljek ýylda ykdysadyýeti güýçlendirmek perspektiwalary bilen baglylykda soňky 10 ýylda iň optimistik çaklamany berýärler. Iň uly dünýä kompaniýalarynyň ýolbaşçylarynyň dörtden üç böleginden gowragy (77%) dünýä ykdysadyýetiniň ýagdaýynyň gowulaşjakdygyny, diňe 15%-i şertleriň ýaramazlaşjakdygyny çaklaýar” – diýip, kompaniýa belleýär.
Optimizm derejesi Hindistanda has ýokary bolup, bu ýerde sorag edilen kompaniýa ýolbaşçylarynyň 94%-i 2022-nji ýylda global ykdysady ösüşe garaşýar. Şeýle-de, oňyn ösüşe uly tamalar Italiýada (soraga gatnaşanlaryň 89%-i), Fransiýada (85%), Ýaponiýada (83%) we Beýik Britaniýada (82%) hasaba alyndy.
Käbir ýurtlarda optimizm derejesi geçen ýylyň pikir soraşmasy bilen deňeşdirilende peseldi. Ýagny, ABŞ-da 2022-nji ýylda ykdysady dikelişe bir ýyl ozalky 88%-e garşy iş berijileriň 70%-i, Braziliýada 85%-e garşy 77%-i, Germaniýada 80%-e garşy 76%-i, Hytaýda 71%-e garşy 62%-i garaşýar. Kompaniýalaryň ýolbaşçylary makroykdysady durnuklylyk üçin esasy howp hökmünde kiber-howplaryny (49%) we saglyk üçin howplary (48%) bellediler. Ýolbaşçylaryň 43%-i inflýasiýanyň we JIÖ derejesiniň üýtgemeginiň bolup biljek täsiri bilen bagly alada galýarlar.
PwC pikir soraşmasy 2021-nji ýylyň oktýabr we noýabr aýlarynda geçirildi. Gözlege 89 döwletden dünýäniň iň uly kompaniýalarynyň 4 446 ýolbaşçysy gatnaşdy.
