Azerbaýjanyň gimnastika federasiýasy nobatdaky uly göwrümli halkara ýaryşyny geçirmäge taýýarlanýar. Bu barada Federasiýanyň saýtyna salgylanyp, Trend habar berdi.
Azerbaýjanda ilkinji gezek batutda we akrobatik ýodada bökmek boýunça dünýä çempionaty geçiriler. Batutda we akrobatik ýodada bökmek boýunça 35-nji dünýä çempionaty 18 – 21-nji noýabrda Bakuwda geçer.
Ýatlap geçsek, öň bu gimnastika dissiplinasy boýunça ýurtda Ýewropa çempionatlary we köp sanly dünýä kuboklary geçirildi, ýöne Bakuwdaky Milli gimnastika arenasynda ilkinji gezek şeýle uly göwrümli ýaryşa batutda we akrobatik ýodada bökmek boýunça dünýä ýyldyzlary ýygnanyşar.
Deslapky hasaba alyş sanawyna görä, ýaryşlara dünýäniň 33 ýurdundan 300-e golaý gimnastikaçy gatnaşar.
Dört gün dowam etjek çempionatda türgenler batutda indiwidual we sinhronlaýyn böküş programmasynda, şeýle-de akrobatik ýodada we ikileýin mini-batutda çykyş ederler. Şeýle-de, topar hasabynda ýeňijiler kesgitlener.
Çempionatyň deslapky tertibine görä, ilkinji iki gün klassifikasiýa ýaryşlary geçiriler, soňky iki gün final çykyşlary bolar. Düzgüne laýyklykda, bir gatnaşyjy birnäçe programmada çykyş edip biler.
