BMG-niň habarlar saýtynda onuň Azyk we oba hojalyk guramasynyň (FAO) maglumatlary getirilip, onda 2021-nji ýylyň maýynda dünýä boýunça azyk önümleriniň bahasynyň soňky 10 ýylyň dowamynda iň ýokary derejä çykandygy habar berilýär. Munuň esasy sebäbi ösümlik ýagynyň, şekeriň hem-de dänäniň dünýä bahasynyň örän çalt ýokarlanmagy bilen baglydyr. Bu görkeziji 2011-nji ýylyň sentýabryndan bäri iň ýokary derejä ýetdi.
FAO-nyň azyk önümleriniň bahasynyň indeksiniň ortaça görkezijisi şu ýylyň maýynda 4,8 göterime deň bolup, ol apreldäkiden we geçen ýylyň maý aýyndaky görkezijiden hem 39,7 göterim ýokarydyr.
Däneli ösümlikleriň bahasynyň ýokarlanmagy mekgejöweniň bahasynyň gymmatlamagy bilen bagly: onuň ortaça bahasy geçen ýyldakydan 89,9 göterim ýokarlandy. Bugdaýyň bahasy hem apreldäkiden 6,8 göterim gymmatlady. Guramanyň bahalar indeksinde ösümlik ýagynyň bahasy 7,8 göterim ýokarlanyp, onuň sebäbi bolsa palma, soýa we raps ýaglarynyň bahasynyň has gymmatlamagydyr.
6,8 göterim bilen şeker hem gymmatlady. Dünýädäki ony esasy eksport edijileriň biri bolan Braziliýada hasyl ýygnamak möwsüminiň öz wagtynda bolmazlygy we garaşylyşyndan az mukdarda hasyl alynmagy muňa sebäp boldy. Şekeriň Hindistandan köp mukdarda eksport edilmegi bahalaryň gymmatlamagyny az-kem peselden hem bolsa, ýaramaz täsirleriň öwezini dolup bilmedi.
FAO-nyň bahalar indeksi — has geçginli azyk harytlarynyň dünýä bahasynyň üýtgäp durmagyna geçirilýän barlaglaryň netijesi bolup, ol her aýda çap edilýär.
