Çip ýetmezçiligi sebäpli awtomobil pudagynyň girdejisindäki ýitgi şu ýyl 110 mlrd dollar bolup biler. Şeýle çaklamany AlixPartners amerikan konsalting kompaniýasy öňe sürýär. Bu barada kommersant.ru habar berýär.
Bu çaklama öňki bilen deňeşdirilende, has ýaramazlaşdy, çünki ýylyň başynda kompaniýa çip ýetmezçiligi sebäpli ýitginiň, takmynan, 61 mlrd dollar bolmagyna garaşypdy. Ýetmezçilik sebäpli awtomobil önümçiliginiň azalmagy bilen bagly çaklamalar hem ýaramazlaşdy. Ýylyň başynda AlixPartners ýetmezçilik bolmazdan öndüriljek awtomobillerden 2,2 mln az awtomobiliň öndürilmegine garaşypdy, häzir bolsa kompaniýa 3,9 mln awtomobiliň azaljakdygyny çaklaýar.
“Çip önümçiliginde pandemiýa sebäpli ýüze çykan çökgünlik adaty ýagdaýda awtomobil pudagy üçin ýoldaky ýönekeý bökdençlik boljak wakalar bilen has hem güýçlendi. Ýagny, şeýle wakalar esasy çip zawodyndaky ýangyny (gürrüň geçen mart aýynda Ýaponiýanyň Renesas Electronics çip öndürijisiniň zawodynda bolan ýangyn barada), Tehasdaky sowuk howany we Taýwandaky gurakçylygy öz içine alýar. Häzir bu zatlaryň ählisi pudak üçin çynlakaý meselä öwrüldi” – diýip, AlixPartners kompaniýasynyň awtomobil pudagy we senagat boýunça dolandyryjy müdiri Mark Ueýkfild çaklamany teswirleýär.
Soňky aýlarda dünýädäki awtomobil öndürijileriniň köpüsi, şol sanda Volkswagen, Jaguar Land Rover, Nissan, Honda, Toyota, Fiat Chrysler, GM çip ýetmezçiligi sebäpli, önümçiligiň azaldylýandygyny ýa-da togtadylýandygyny, şeýle-de bu meseläniň girdejilerine ýaramaz täsir edýändigini habar berdiler.
