Şwesiýada BSGG-ni “maglumatlary nädogry düşündirýändigi” sebäpli tankytladylar

Bütindünýä saglygy goraýyş guramasy (BSGG) koronawirus ýaýrawynyň depgini barada gürrüň gidende Şwesiýany “howpsuz däl ýurt” hasaplaýar we ony Albaniýa, Moldawiýa we Azerbaýjan ýaly ýurtlaryň hatarynda goýýar. Öz gezeginde Şwesiýanyň döwlet epidemiology Anders Tegnell BSGG-niň garaýşyny “maglumatlary düýbünden ýalňyş düşündirýändigi” sebäpli tankytlaýar. Bu barada SVT Nyheter agentligi habar berýär, muny regnum.ru ýetirýär.
Belläp geçsek, Şwesiýa Ýewropa Bileleşiginiň epidemiýany saklamak üçin “özüňi üzňelikde saklamak” režimini girizmedik we mekdepleri hem-de jemgyýetçilik ýerlerini ýapmadyk ýeke-täk ýurdy bolmagynda galýar. Ilata diňe sosial aradaşlyk düzgünlerini berjaý etmek maslahat berildi. 
Öň BSGG koronawirus ýaýrawynyň depgininiň çendenaşa ýokary bolan on bir ýurdy bilen baglylykda ýörite duýduryş çykardy. Şwesiýadan başga-da sanawa Ermenistan, Moldawiýa, Demirgazyk Makedoniýa, Azerbaýjan, Gazagystan, Albaniýa, Bosniýa we Gersegowina, Gyrgyzystan, Ukraina we Kosowo girdi. Ýöne Şwesiýanyň döwlet epidemiology BSGG-niň düşündirmesi bilen düýbünden ylalaşmaýar we ol epidemiologik ýagdaý ýurtda ýaramaz görnüp biler, ýöne munuň hakykat bilen hiç hili gatnaşygy ýok diýip hasaplaýar.
“Bizde Şwesiýada ýüze çykarylýan ýagdaýlaryň sany artýar, ýöne bu biziň öňkä garanda has köp adamy barlagdan geçirýändigimiz sebäplidir. Gynansak-da, adamlar Şwesiýany hiç hili meselesi bolmadyk ýurtlar bilen garyşdyrýarlar, olaryň bolsa özleriniň epidemiýasynyň başlangyjynda bolmagy ahmal. Gynansak-da, bu maglumatlaryň düýbünden nädogry düşündirilişi” – diýip, Tegnell gaharlanýar hem-de BSGG-niň wekilleriniň ýagdaýy anyklaşdyrmak üçin özleriniň şwed kärdeşleri bilen habarlaşmandygyny hem sözüniň üstüne goşýar. Ol Şwesiýada koronawirusdan ýogalma derejesiniň peselýändigini hem belledi. 
Şu günki günde Şwesiýada COVID-19-yň 68 390 ýagdaýy bellige alyndy, 5230 adam ýogaldy. Bu bolsa Demirgazyk Ýewropanyň beýleki ýurtlarynyň görkezijilerinden hem ýokarydyr, ýöne şwed ykdysadyýeti birinji ýarymýyllykda ösüşi görkezdi.