BSGG-da maskalaryň döredýän howpy barada duýdurdylar

Koronawirusyň öňüni almak boýunça beýleki çäreleri görmezden, gorag maskalaryny dakynmaklyk COVID-19 bilen kesellemek howpuny ýokarlandyrýar. Bu barada BSGG-nyň Russiýadaky wekili habar berýär diýip rg.ru bize ýetirýär.
“Diňe maskany dakynyp, beýleki zatlary taşlasaňyz, ýagny araçägi saklamasaňyz, eliňizi ýuwmasaňyz – siz kesellärsiňiz” – diýip, ol belleýär. Ol hemişe çalşyryp durar ýaly maska ätiýaçlygynyň bolmalydygyny aýdýar. “Maska öl bolmaly däl. Ony iki sagat ulananyňdan soň zyňmak bolar. Ýogsam, siz infeksiýanyň çeşmesine öwrülersiňiz” – diýip, BSGG-niň wekili duýdurýar.
Ýene bir howp adamlaryň maskany ulanmak bilen özlerini koronawirusdan goragly ýaly duýmagynda jemlenýär, adamlaryň özlerini alyp barşy üýtgeýär, olar seresapsyz bolup başlaýarlar. Şunuň bilen baglylykda wekil sosial araçägi saklamagy maslahat berýär. Onuň pikiriçe, bu maska garanda koronawirusdan gowy gorar. “Eger-de sagdyn adam ýarawsyz bilen bir otagda ýerleşmeýän bolsa, oňa maska gerek däl. Eger-de ol köpçülikde bolsa, onda gerek”.
Maskany köçede dakynmagyň hiç hili geregi ýok, sebäbi koronawirusyň konsentrasiýasy howada örän az, ýöne jemgyýetçilik ýerlerinde – dükanlarda, ulaglarda ony dakynmalydyr.
Häzirki wagtda bu gorag serişdelerini dermanhanalarda tapmak kyn we olar, ilkinji nobatda, lukmanlara gerek.
Hökümetler öňüni alşyň beýleki çäreleriniň berjaý edilmeginiň möhümdigini belleýärler. Eliňi sabyn bilen ýuwmaly, boldugyndan eliňi ýüzüňe degirmeli däl, daşaryk seýrek çykmaly, 1,5-2 metrde araçägi saklamaly. Ýüzüňe diňe arassa eliň bilen ýa-da arassa süpürgiç bilen degmek bolýar.