Nike awtomatik bagjykly “akylly” krossowkalaryny çykardy

Nike kompaniýasy özüniň “akylly” Adapt BB 2.0 krossowkalaryny hödürledi. Onuň resmi görkezilişi Çikagoda amerikan Milli basketbol assosiasiýasynyň ähli “ýyldyzlarynyň” duşuşygynda geçirildi.
5-tv.ru-nyň “FAN” internet neşirine salgylanmak bilen habar bermegine görä, “akylly” sport aýakgaplarynyň esasy aýratynlygy ony mobil telefony arkaly dolandyryp bolýanlygyndan ybaratdyr. Kompaniýanyň işgärleri sport aýakgabynyň täze modeliniň geçen ýyl çykarylan Adapt BB-niň kämilleşdirilen wersiýasyna eýedigini belleýärler. Nike-yň “akylly” krossowkalary bagjygy özbaşdak daňyp bilýärler, bagjyklary sazlamak hem bolýar. Ýörite programmada Bluteooth-yň kömegi bilen ulanyjy bagjyklaryň ýagdaýyny, aýakgabyň içindäki temperaturany we hatda çyglylygy gözegçilikde saklap bilýär. Şeýle-de, krossowkalaryň ýagtylanmagyny we aýagyň formasyna görä oturyşyny hem sazlamak bolýar. Kontrollyk ediji gurluş aýakgap dabanynda bildirmeýän gapagyň aşagynda ýerleşýär.
Nike kompaniýasynda bellenilişi ýaly, “akylly” krossowkalar, ilkinji nobatda, basketbolçylara niýetlenilen. Hut şonuň üçin ABŞ-da 16-njy fewralda, ýagny ähli “ýyldyzlaryň” NBA 2020 duşuşygy gününde bu krossowkalaryň satuwyna başlandy. Model Adapt BB 2.0 öňküsine garanda gymmadrak.