Gorkunç filmler gorky bilen howsalanyň arasyndaky tapawudy kesgitlemäge kömek etdi

Fin alymlary gorky bilen howsalanyň hersiniň aýry neýron tebigatyna eýedigini anyklamagy başardylar. Munuň üçin olar synagdan geçirilýän topara gorkunç kinolary görkezdiler, diýip «N+1» neşiri ýazýar.
Bu iki duýgy örän gadymy we olar köp ýagdaýda janly organizmlerde ewolýusiýanyň bolup geçmegine ýardam etdiler. Gorky ilkibaşda howpuň gelenligi bilen bagly reaksiýa hökmünde ýüze çykdy, howsala — bu howpuň hakykatda ýüze çykmazyndan ony duýmaklyk.
Bu iki reaksiýanyň neýron tebigatyny kesgitlemek üçin Finlýandiýanyň Turku uniwersitetiniň alymlar topary adamlary gorkuzmak kararyna geldiler.
Alymlar IMDB, Rotten Tomatoes we AllMovie portallarynyň statistiki maglumatlary esasynda, şeýle-de, iki ýüz adamdan edilen soragyň netijesinde iki sany iň gorkunç filmi saýladylar. Olar «Astral» we «Zaklýatiýe 2» filmleri boldy. Şondan soň 37 sany meýletinçini aldylar, olary iki topara böldüler. Her topara bir filmi görkezdiler.
Kinoseans wagtynda tejribeden geçirilýänleriň beýnisiniň reaksiýasyny funksional magnit-rezonans tomografiýasynyň kömegi bilen ölçediler. Ölçemäniň netijeleri skrimerler wagtynda (filmdäki gorkunç we duýdansyz pursatlar) adamlarda beýniniň emosiýa bilen bagly böleginiň işleýändigini görkezdi. Filmiň beýleki ýerleri görlen wagtynda bolsa sensor kabul ediş, ýagny eşidiş we görüş bilen bagly bölekler işläp başladylar.
Alymlar gorky (skrimerler wagtynda) dünýäni we özüňi emosional kabul ediş bilen bagly, howsalalyk duýgusy bolsa (filmiň galan bölegi) duýgy organlaryna täsir edýär diýen netijä geldiler.