Sişenbe güni Çempionlar ligasynyň toparçalardaky tapgyrynyň oýunlary geçirildi. Bu duşuşyklar dogrusynda käbir maglumatlary dykgatyňyza ýetirýäris.
«А» topar
«Galatasaraý» — «Brýuge» — 1:1 (Adem Büýuk, 11 — Diatta, 90+2).
Çempionlar ligasynyň toparçalaýyn tapgyrynyň başky dört oýnunda «Galatasaraý» esasy düzümde ýekejede türk oýunçysyny çykarmandy. Bu tapgyrda bolsa, birbada ikisini çykardy. Şolaryň biriniň — Emer Baýramyň ýardam pasy bilen Adem Büýuk gol saldy. Emma «Brýugge» goşmaça wagtda deňme-deňligi gazanmagy başardy.
«Real» — «PSŽ» — 2:2 (Benzema, 17, 79 — Mbappe, 81, Sarabiýa, 83).
«Real» duşuşygyň başky ýarym sagadynda artykmaçlyk görkezdi we Benzemanyň kömegi bilen gol saldy. Ikinji ýarymda oýna Beýl girdi. Benzema 79-njy minutda ikinji pökgüsini hem geçirdi. Emma «PS» gysga wagtyň içinde oýny deňläp, 2:2 hasap etdi. Bu toparlaryň ikisi hem indiki tapgyra ynamly gadam basýarlar.
«B» topar
«Tottenhem» — «Olimpiakos» P — 4:2 (Alli, 45+1. Keýn, 50, 77. Orýe, 73 — El-Arabi, 6. Ruben Semedu, 19).
Žoze Mourinýo Çempionlar ligasynda 11 aýlap bolmandy. Täze topary bilen bu duşuşygynda bolsa, grekler 2 gol bilen dessine öňe saýlandylar. Emma birinji ýarym tamamlanmazyndan öň, Alli bir gol salmagy başardy. 50-nji minutda bolsa, hasap deňlendi. «Tottenhem» hüjümini artdyryp Orýeniň we Keýniň kömegi bilen hasaby artdyryp, üstün çykdy.
«Srwena Zwezda» — «Bawariýa» — 0:6 (Goreska, 14. Lewandowskiý, 53, pen., 60, 64, 67. Tolisso, 90).
Mýunhen klubynyň täze tälimçisi Hans-Diter Flik Gnabri, Mýuller we Kimmih ýaly oýunçylaryna bu duşuşykda dynç berdi. Emma onuň esasy hüjümçisi Robert Lewandowskiýniň özi ýatdan çykmajak oýun görkezdi. Bary-ýogy 14 minutda dört gol saldy. Çempionlar ligasynda gollarynyň sany boýunça Lewandowskiý (10 gol) iň öňdäki ýeri eýeleýär.
«C» topar
«Mançester Siti» — «Şahtýor» — 1:1 (Gýundogan, 56 — Solomon, 69).
Hasap 56-njy minutda Gýundoganyň Gabriel Žezusyň pasy bilen geçiren goly arkaly açyldy. «Siti» ahyryna çenli bu hasaby saklap bilmedi. Oňa derek, «Şahtýor» hasaby deňläp, özi üçin wajyp bolan deňme-deňligi gazanmagy başardy.
«Atalanta» — «Dinamo» Z — 2:0 (Muriel, 27, pen. Gomes, 47).
27-nji minutda «Dinamo» Z-niň goragçysy jerime meýdançanyň içinde Murieli ýykdy. Netijede «Atalantanyň» hüjümçisi derwezä gol saldy. Ikinji ýarymda hem Bergamodan gelen topar hasaby 2:0-a çykardy.
«D» topar
«Ýuwentus» — «Atletiko» — 1:0 (Dibala, 45+2).
Kriştianu Ronaldu Çempionlar ligasynda 175-nji gezek oýna çykyp, bu görkeziji boýunça Paolo Maldiniden öňe geçdi. Öňde diňe Iker Kasilýas galdy (188 oýun).
Duşuşygyň birinji ýarymynda Ronaldu känbir göze ilmese-de, Dibala aýgytly oýun görkezdi. Argentinaly oýunçy birinji ýarymyň gutarmagyna sekuntlar galanda jerime urgudan möwsümiň iň owadan gollarynyň birini saldy.
«Lokomotiw» — «Baýer» — 0:0 (Žemaletdinow, 11, öz derw., S.Bender, 54).
