Dünýä modasynyň meşhur dizaýnerleri Aşgabatda täze kolleksiýalaryny görkezdiler

Aşgabatda açylan «Türkmenistanyň senagat pudaklarynyň ösüşiniň esasy ugurlary» atly Halkara sergisiniň çäklerinde Fransiýanyň Maison Сoudert modalar öýüniň hem-de Özbegistanyň «Sharg liboslari» Dizaýn merkeziniň wekilleri Aşgabatda ilkinji gezek öz lybaslar toplumlaryny görkezdiler. Bir toplumda dürli ýüpek matalaryň sazlaşygy, bezeginiň nepisligi we gözelligi, ajaýyp agşamky lybaslarda Swarowski gymmatly daşlaryň ýalpyldylary jadyly ertekiler dünýäsini ýada saldy.
Aşgabadyň Modalar öýüniň hödürlän keteniden, şifondan, taftdan, mahmaldan tikilen ajaýyp egin-eşiklerini görkezýän gyzlarymyzyň lybaslarynyň owadan görnüşleri daşary ýurtly synçylary hakykatdan-da haýran galdyrýar. Milli lybasyň däp-dessurlaryny we biçimçiligiň hem-de bezegçiligiň häzirki zaman ugurlaryny özünde jemleýän işleri matalaryň diňe bir ýokary hilliliginiň däl, eýsem, türkmen modasynyň çalt tanalýan gaýtalanmajak görnüşiniň iň oňat mahabaty bolup durýar.
Daşary ýurtly hem-de türkmen dizaýnerleriniň ylhamy we zehini bilen döredilen ajaýyp lybaslarynyň toplumlary milli lybaslary taýýarlamagyň gadymy ýörelgelerini hem-de häzirki zaman meýillerini özünde jemläp, türkmen önümleriniň ýokary hilini beýan edýän özboluşly mahabata öwrüldi. Ýüpekden, mahmaldan hem-de keteniden işlenip taýýarlanan, nagyşlar bilen bezelen ajaýyp lybaslar, şeýle hem adatça toý dabaralarynda zenanlaryň ajaýyp bezegine öwrülýän lybaslar kümüş şaý-sepleriniň sazlaşygynda tomaşaçylaryň el çarpyşmalaryna mynasyp boldy.