Sözüň doly manysynda aýtmak bolar — bu günki gün körpejeleri ulaltmak ýaly kyn işi bir gezeklik çaga arlyklary bolmazdan göz öňüne getirmek kyn. Eýsem, çaga arlyklaryny nädip saýlamaly, ilkinji nobatda nämä üns bermeli?
Bir gezeklik çaga arlyklary — körpeleriň iň ýakyn dostudyr. Dermatologlaryň biragyzdan tassyklamagyna görä, bir gezeklik arlyklaryň peýda bolmagy bilen dermatit we gyzarma ýagdaýlary seýrek duş gelip başlapdyr. Emma bu arlyklaryň ählisiniň ähli çagalar üçin deň derejede täsirlidigini aňlatmaýar. Siziň dostuňyzyň çagasyna diýseň laýyk gelen arlyk siziň çagaňyza laýyk gelmän biler. Bu diýildigi, arlyk saýlamaklygy synaglaryň we ýalňyşlyklaryň üsti bilen amala aşyrmaly. Bu babatda şulary maslahat berip bolar:
- Birinji gezek arlyk satyn alanyňyzda, içinde iň az mukdarda arlyk bar bolan upakowkany alyň. Bu eger-de arlyk çaga kiçi bolsa ýa-da onda allergiýa reaksiýalaryny döretse sizi artykmaç çykdajylardan halas eder;
- Özüni oňat tanadan we barlanan öndürijileriň arlyklaryndan peýdalanyň. Çünki olaryň ählisi howpsuzlyk, hil we netijelilik barlaglaryndan geçirilýär;
- Öndürilen senesini we ýaramlylyk möhletini barlamagy unutmaň. Möhleti geçen arlyk täsirliligini ýitirýär. Daş gabynyň abat bolmagy hem möhümdir.
- Arlyklary çaganyň ýaşyna däl-de, agramyna salgylanyp, ölçegi boýunça alyň. «Mini» – 5 kg çenli; «midi» – 9 kg çenli; «maksi» we «maksi+» – 20 kg çenli; «ýunior» – 20 kg-den ýokarda.
Elbetde, çaganyň agramy gutarnykly görkeziji däl. Şol bir agramda dürli çagalaryň beden gurluşy dürlüdir. Has kiçi arlyk tiz dolar we derini gyjyndyrar. Has ulusy bolsa ykjam oturmaz. Körpeleriň tiz ösýändigini nazara alyp, iň kiçi arlyklar eýýäm birnäçe hepdeden kiçi bolup biler.
Mundan başga nämä üns bermeli?
Döwlet standartlaryna laýyklykda, arlyklaryň daşky ýetmezçilikleri bolmaly däldir: kesilen, bölünen, ýurtylan. Tikinler üznüksiz bolmaly.
Arlygy ýagta tutup görüň — onuň toplanýan ýeri jebis we deňagramly bolmaly. Tene ýakymly bolmaly. Şepbeşik bolmaly däl.
Arlygyň jaýdar oturandygyny nädip anyklamaly?
- Ol göbege çenli ýetip durýar.
- Guşaklygy biliňe jebis oturýar.
- Gapdal aýlawlary aýajyklary jebisje ýapyp durýar.
- Ildirgiçler deň oturan bolmaly.
Çaga arassaçylygynyň düzgünleri
Ene-atalaryň ýatda saklamaly zady — çaga arlygy näçe siňdiriji bolsa hem çagajygyň derisi gyjyndyryjylar bilen galtaşýar (peşew we ş.m). Bu bolsa epidermisiň goraýjylyk ukybyny peseldýär. Çagajygyň näzik teni gowşak bolýar we gyjynma hem-de çişmä sezewar bolýar.
Munuň öňüni almak üçin, birinjiden, arlyklary zerur bolan badyna çalşyp durmaly. Ikinjiden, çaganyň teniniň ýagdaýyna gözegçilik edip durmaly. Hiç hili kremsiz ýa-da ýagsyz oňup bilýän körpejeler hem, gorag serişdesini talap edýän gala hem bar. Goragy kosmetiki serişdeler döredýär: kremler, pastalar, prisypkalar. Mysal üçin, kremler derini ýumşatmak we iýmitlendirmek üçin gerek, prisypka bolsa ony guratmak üçin gerek.
Galyberse-de, beýleki arassaçylyk kadalaryny ýatdan çykarmaly däl — yzygiderli suwa düşürip durmak, deri çişlerini bejermek. Bu zatlar berjaý edilende, körpejäniň derisi sagdyn bolar.
