Alabaý we kawkaz owçarkalary emlägi hem-de eýesini goramakda itleriň içinde iň gowy tohumlar hasaplanylýar, diýip Russiýanyň kinologiýa federasiýasynyň prezidenti Wladimir Golubew Ria Nowosti habarlar agentligine gürrüň berdi.
«Bu tohumlardan bolan itler eýesiniň bar wagty hem, ýok wagty hem özbaşdak çözgüt kabul etmäge ýykgyn edýärler. Hut şonuň üçin hem olar hökmany tertipde baş öwretme kurslaryny geçmeli» - diýip ol belleýär. Bilermeniň pikirine görä, bu jandarlara ýagdaýy dogry kabul etmegi — haýsy ýagdaýda güýç ulanyp, haýsy ýagdaýda güýç ulanmaly däldigini öwretmeli.
Golubewiň bellemegine görä, baş öwretmek bilen diňe degişli bilimi we iş tejribesi bolan hünärmenler meşgullanmaly. Eýesi tarapyndan baş öwretmekde we dolandyrmakda iň gowulary hökmünde goragçy itler hasaplanylýar, diýip Golubew aýdýar. Olar partlaýjy we neşe serişdelerini, adamlary gözlemek üçin, düzgün bozujylary tutmak üçin, betbagtçylyklardan soň ýumrulmalaryň aşagyndan adam tapmak üçin peýdalanylýar.
Garawul hem-de çopançylyk işini ýerine ýetirýän itler goragçy itler hasaplanylýar. Nemes we belgiýa owçarkalary, rotweýlerler, labradorlar, spaniýeller — goragçy itlere aýdyň mysaldyr, diýip Golubew belledi. «Itleriň bu tohumlarynyň ählisi hem sagdynlygy, çydamlylygy, mert häsiýeti, özüne bolan ynamy we gaýduwsyzlygy bilen tapawutlanýarlar. Hut şonuň üçin hem olar iň çylşyrymly şertlerde uzak wagty dowamynda iş alyp barmaga ukyplydyr» diýip kinolog belleýär.
