«Türkmenhowaýollary» tomusda Aşgabatdan Ýewropa uçuşlary gaýtadan ýola goýar

«Türkmenhowaýollary» awiakompaniýasy tarapyndan Aşgabatdan Birmingeme, Londona we Maýn boýundaky Frankfurta göni uçuşlar 2019-njy ýylyň 1-nji iýunyndan gaýtadan ýola goýlar. Bu barada Turkmenportal «Türkmenhowaýollarynyň» resmi saýtyna salgylanyp habar berýär. Bu uçuşlar hakynda maglumatlar «Türkmenhowaýollarynyň» resmi saýtynda (turkmenistanairlines.tm) uçuşlaryň ugrunyň we rejesisiniň täzelenen tertibinde berilýär.
Ýatlap geçsek, türkmen uçarlarynyň Ýewropa Bileleşiginiň şäherlerine uçuşlarynyň togtadylmagyna howa gämilerini ulanmaklygyň talaplaryny we standartlaryny kesgitleýän amerikan we ýewropa ulgamlaryndaky çaprazlyk sebäp bolupdy. Awiahowpsuzlyk boýunça Ýewropa agentligi 2019-njy ýylyň 4-nji fewralyndan başlap Ýewropa Bileleşiginiň ýurtlaryna uçuşa rugsady ýatyranyndan soňra, 2019-njy ýylyň gyşynda «Türkmenhowaýollary» wagtlaýynça Ýewropa şäherlerine uçuşlaryny saklady.
Soňky ýyllarda ýurdumyzyň awiaparky «Boeing» kompaniýasynyň dünýäde özüne tanadan nusgalarynyň birnäçesi bilen dolduryldy. Netijede, 2013-nji ýylda «Boeing-737-800» kysymly howa gämisiniň 3-si, 2014-nji ýylda «Boeing-777-200LR» kysymly howa gämisiniň 2-si, 2015-nji ýylda bolsa «Boeing-737-800» kysymly howa gämisiniň ýene-de 3-si satyn alyndy. 2016-2018-nji ýyllarda hem bu kysymly uçarlaryň birnäçesi satyn alyndy. Mundan başga-da, içerki howa gatnawlarynda ulanmak maksady bilen sygymlylygy 50 we 100 ýolagça niýetlenen howa gämilerini satyn almagyň mümkinçilikleri öwrenilýär.