Howpsuzlygy mese-mälim görnüp durandygyna garamazdan, köp sanly ulanyjylar öz poçtalary üçin iň ýönekeý parollary saýlaýarlar. Bilermenler sanlaryň ýönekeý yzygiderliginden başga-da, öz adyňy hem-de söýgüli futbol toparyň adyny parol hökmünde peýdalanmakdan saklanmagy maslahat berýärler.
Beýik Britaniýanyň Kiberhowpsuzlyk boýunça milli merkezi tarapyndan geçirilen barlaglaryň netijelerine görä, tutuş dünýäde 23 million adam häli-häzirem «123456» sanlary parol hökmünde peýdalanýarlar.
Ýaman niýetliler üçin ýeňiljek hem-de howply bolan bu parol öňdeligi saklaýar. Mundan başga-da, iň ýörgünli howply parollaryň sanawyna «123456789» san yzygiderliligi hem girdi. 8 milliondan gowrak adam şu paroldan peýdalanýar.
Köp sanly ulanyjylar «qwerty» we «password» ýaly 4 million adamyň peýdalanýan parollaryny howpsuz hasaplap ýalňyşýarlar. Bäşinji ýerde «1111111» ýedi sany birlik durýar.
Bilermenleriň bellemegine görä, ýeňil bilinjek sözler, mysal üçin, doglan gün, söýgüli aýdymçyň ýa-da artistiň, türgeniň, şeýle hem edebi eserleriň gahrymanlarynyň atlary hem parol hökmünde ulanylmaly däldir.
Olaryň tassyklamagyna görä, parol hökmünde özara baglanyşygy bolmadyk üç söz ulanmak iň amatlysydyr. Bu hili kombinasiýalary kesekiler döwüp bilmez.
«123456» millionlarça adamlaryň ulanýan iň ýörgünli paroly
- 02.05.2019 00:07
- 3k+
