Türkmenistanda öndürilen dokma we tikinçilik önümleri Ýaponiýanyň paýtagtynyň «Tokyo International Forum» sergi merkezinde geçirilen «Jitac European Textile Fair Spring — 2019» halkara sergide görkezildi. Ýokary hil derejesi hem-de özboluşlylygy bilen tapawutlanýan türkmen dokma we tikinçilik önümleri sergä gatnaşanlarda uly gyzyklanma döretdi.
Serginiň esasy maksady Aziýa ýurtlarynyň tikinçilik senagat önümlerini öndürijileriniň we import edijileriniň arasyndaky hyzmatdaşlygy berkitmek hem-de oňa gatnaşyjylaryň tagallalaryny birleşdirmek arkaly dokma bazaryny has-da ösdürmek bolup durýar.
Tokioda geçirilen serginiň dowamynda Türkmenistanda öndürilýän dokma önümlerine bagyşlanan ýörite tanyşdyrylyş dabarasy hem guraldy.
