«Barselona» klubuna täzelikde goşulan Robert Lewandowski katalon toparynyň futbolçysy hökmünde resmi taýdan tanyşdyryldy. Bu barada katalonlylaryň sosial sahypasynda habar berilýär.
Tanyşdyrylyş dabarasy «Barselonanyň» täze möwsüme taýýarlyk görýän ýeri bolan Maýamide (ABŞ) geçdi.
19-njy iýulda katalon klubunyň Lewandowskiniň transferini mälim edendigini ýatlalyň. «Barselona» Robert üçin Mýunheniň «Bawariýasyna» 45 mln ýewro töledi, ýene 5 mln ýewrony dürli bonuslar görnüşinde bermek göz öňünde tutuldy.
33 ýaşly Lewandowski katalonlylar bilen dört ýyllyk şertnama gol çekişdi. Şertnamanyň bir düzgünnamasyna laýyklykda polşaly futbolçynyň dänme haky 500 mln ýewrodan ybarat.