Birleşen Arap Emirlikleriniň iň iri awiakompaniýasy bolan Emirates ýyllyk ýitgileriniň 1,1 mlrd dollara çenli azalandygyny, munuň özi geçen ýyla garanyňda 4,4 mlrd dollar kemdigini mälim etdi. Bu barada anna güni kompaniýanyň saýtynda çap edilen hasabatda habar berilýär. Muny TASS-a sagylanyp, Trend habar berýär.
Ýolagçy gatnawlarynyň dikelýändiginiň hasabyna awiakompaniýanyň 2021-nji ýylyň 31-nji martynda tamamlanan maliýe ýylynda girdejisi 16,1 mlrd dollar bolup, 91% artdy. Hasabat ýylynda 19,6 mln adam awiakompaniýanyň hyzmatlaryndan peýdalandy diýip, resminamada aýdylýar. Awiakompaniýanyň 2021-nji maliýe ýylynda ýerine ýetiren gatnawlarynyň dolujylygy, 2020-nji ýyldaky 44,3% bilen deňeşdirilende, 58,6%-e ýetdi.
Pandemiýa sebäpli we halkara howa gatnawlaryna girizilen çäklendirmeler bilen bagly awiakompaniýa işgärleriniň bir bölegini gysgaltmaga mejbur boldy, emma ýolagçy gatnawlary dikeldilenden soň, Emirates Group-yň işgerleriniň sany, hasabatda habar berlişine görä, 13% artdy. 31-nji martdaky ýagdaýa görä, awiakompaniýada 85 219 adam işleýär.
Emirates-iň sebitdäki esasy bäsdeşi - Qatar Airways katar awiakompaniýasy. Onuňam maliýe ýylynyň 31-nji martda tamamlanandygyna garamazdan, heniz öz netijelerini yglan etmedi.