Filippinleriň iň garry ýaşaýjysy Fransiska Susano 124 ýaşynda Günbatar Negros welaýatynda dogduk şäheri Kabankalanda aradan çykdy. Bu barada ýerli häkimiýetleriň beýanatyna salgylanyp, “Inquirer” gazeti habar berdi. Muny TASS ýetirýär.
Susano ýa-da Filippinlerde atlandyrylyşy ýaly “Lola Iska” duşenbe güni agşam ýogaldy. Şol gün gündiz ol agyr dem alyşdan zeýrenipdi.
Susano 1897-nji ýylyň 11-nji sentýabrynda dünýä indi. Onuň 14 çagasy bolup, häzirki wagtda şolardan sekiz sanysy ýaşaýar. Şeýle-de, onuň 500-den gowrak agtygy bar. Neşir Susanonyň planetanyň iň garry ýaşaýjysy hökmünde Ginnesiň rekordlar kitabynda orun alyp biljekdigini, ýöne onuň maşgalasynyň guramaçylaryň ähli talaplaryny ýerine ýetirip bilmändigini belleýär.
Kitabyň maglumatlary boýunça, häzirki wagtda resmi hasaba alnan rekord ýaponiýaly Kane Tanaka degişlidir. Ýanwar aýynyň başynda ol 118 ýaşyny belledi. Uzak ýaşamagyň absolýut rekordy fransiýaly Žanne Kalmana degişli – 1997-nji ýylyň awgust aýynda aradan çykan wagty onuň ýaşy 122 ýyl we 164 gündi.