UEFA-nyň Milletler ligasynyň finalynda Fransiýa Ispaniýadan üstün çykdy. Milanyň (Italiýa) "Juzeppe Meazza" stadionynda geçirilen duşuşyk 2:1 hasabynda tamamlandy.
Hasaby 64-nji minutda Ispaniýanyň milli ýygyndysynyň hüjümçisi Mikel Oýarzabal açdy. Iki minutdan soň Kilian Mbappeniň pasy bilen Karim Benzema hasaby deňledi. 81-nji minutda Kilian Mbappe Fransiýany öňe çykardy.
Ýaryşyň ýarym finalynda Ispaniýanyň milli ýygyndysy Italiýany (2:1), Fransiýa bolsa Belgiýany (3:2) ýeňip, finala çykypdy.
Şeýlelikde, Fransiýa Milletler ligasynyň taryhda ikinji ýeňijisi boldy. Ilkinji kubogy Portugaliýanyň milli ýygyndysy alypdy.