Ispaniýa dünýäde iň köp arassa suwa düşülýän kenarlary (plýaž) bolan ýurt diýlip atlandyryldy. Bu barada suwy ýokary ülňülere laýyk gelýän we howpsuz suwa düşmek üçin amatly bolan kenarýakalara we gämi duralgalaryna her ýyl berilýän “Mawy baýdak” baýragynyň saýtynda habar berilýär. Muny lenta.ru ýetirýär.
Bu baýraga jogapkär bolan Ekologiýa bilim gaznasy (FEE) dünýäniň 49 ýurdundan ybarat sanawy düzmek bilen, olaryň her birinde suwuň hiline baha berdi.
Sanawda birinji orny Ispaniýa eýeledi – patyşalygyň 614 kenarynda hapa tapylmady. Ikinji orny Gresiýa (545 arassa kenar), üçünji orny Türkiýe (519 kenar) eýeledi. Sanawda Fransiýa (410 kenar), Italiýa (416 kenar), Portugaliýa (372 kenar), Daniýa (168 kenar) we Niderlandlar (56 kenar) hem bar.
