Konsept-ulag “Lexus LF-Z Electrified” diýlip atlandyryldy. Ol kompaniýanyň ýakyn dört ýylda çykarjak modellerinde durmuşa geçirmegi meýilleşdirýän esasy tehnologiýa täzeliklerini özünde birleşdirýär. Bu barada auto.mail.ru habar berýär.
Geljekde kompaniýanyň esasy tehnologik çözgütleriň biri akkumulýatory poluň aşagynda uzaboýuna ýerleşdirmek bolar. Bu bolsa elektrik ulagynyň gurluşyny has berkleşdirýär, agyrlyk merkezini peseldýär we ýoluň örtügi sebäpli döreýän sesleri we titremäni siňdirmäge kömek edýär.
Ýene bir aýratynlyk, hereketlendirijiniň güýjüni dört tekeriň hersine erkin paýlaýan dört tekerli dolandyryş ulgamy, şeýle hem rul bilen tekerleriň arasynda mehaniki baglanyşygy bolmadyk steer-by-wire elektron rul dolandyryş ulgamy bolar.
Şeýle hem dizaýnerler agyrlyk merkezini peseltmek we elektrik awtoulagynyň durnuklylygyny ýokarlandyrmak maksady bilen, awtoulagyň kuzowyny minimalistik stilde ýasadylar, uly diametrli tekerleri awtoulagyň burçlaryna has ýakyn ýerleşdirdiler.
Interýer babatda “Lexus” Tazuna (“jylaw”) konsepsiýasyndan peýdalandy. Oňa laýyklykda, awtoulag sürüjiniň “dowamyna” öwrülmeli. Konsepsiýanyň aýratynlyklarynyň biri, sürüji üçin maglumat çeşmeleriniň (proýeksiýa ekrany, sensorly multimediýa ekrany we beýlekiler) bir modulda bolmagy we sürüjilik ulgamynyň dolandyryş organlarynyň ruluň töwereginde jemlenmegidir.
Sürüjä ses bilen dolandyrylýan emeli intellekt kömek eder. Mysal üçin, emeli intellekt marşruty meýilleşdirip, baryljak ýer barada maglumat berip biler.
Köp adama elýeterli bolmagy üçin awtoulagda sanly açar göz öňünde tutulan. "LF-Z Electrified"-iň käbir funksiýalaryny, meselem, gapylary gulplamagy we açmagy smartfon arkaly dolandyryp bolýar. Gapyny açmak üçin bolsa ýanyň açarlyka, gapynyň gulpundaky datçige eliňi degirmek ýeterlik.
"LF-Z Electrified"-den çykmak üçin diňe gapyny açýan düwmä basmak ýeterlik. Şondan soňra howpsuzlyk ulgamy töwerekdäki giňişligi seljerýär we ýakynlaşyp gelýän ulag serişdesi barada duýduryş berýär.
Şeýle hem konsept-ulag täze nesliň Mark Levinson ses ulgamy bilen enjamlaşdyryldy. Ses dolandyryş funksiýasy daş-töwerekdäki artykmaç sesleri basyp, kabinanyň içinde gürleşmegi aňsatlaşdyryp bilýär.