FIDE dalaşgärler ýaryşynyň gaýtadan başlajakdygyny habar berdi

FIDE dalaşgärler ýaryşynyň gaýtadan başlajakdygyny habar berdi

Halkara küşt federasiýasynyň (FIDE) koronawirus pandemiýasy sebäpli togtadylan Dalaşgärler ýaryşy 19-njy aprelde Ýekaterinburgda dowam etdiriler. Bu barada federasiýanyň web sahypasyna salgylanyp, championat.com habar berdi.

Ýaryş 2020-nji ýylyň 17-nji martynda Ýekaterinburgda başlanyp, birinji aýlawyň oýunlary - ýedi tapgyr oýnalypdy. Indi ýaryş dowam etdirilip, 2021-nji ýylyň 19-njy aprelinde sekizinji tapgyr başlanar. Küşt boýunça dünýä çempionlygyna dalaşgäriň kim boljagy 28-nji aprelde kesgitlener, zerur bolan ýagdaýynda, taý-breýk geçiriler.
Dalaşgärler ýaryşynda fransuz Maksim Waşýe-Lagraw we russiýaly Ýan Nepomnýaşiý ýedi tapgyrdan soň hersi 4,5 utuk toplap, öňde barýarlar. Olardan soň russiýaly Aleksandr Grişuk, gollandiýaly Aniş Giri, amerikaly Fabiano Karuana, hytaýly Wan Hao (hemmesi - 3,5), russiýaly Kirill Alekseýenko we hytaýly Ding Ližen (ikisi-de - 2,5) gelýär.
Bäsleşigiň ýeňijisi 24-nji noýabrdan 16-njy dekabr aralygynda Dubaýda geçiriljek dünýä çempiony norwegiýaly Magnus Karlsen bilen küşt täji ugrunda oýnamaga hukuk gazanar.