"Barselonanyň" kapitany Lionel Messi meýdançada we onuň çäginden daşarda bitiren ähli işleri üçin "Dünýä çempiony" baýragyny aldy. Ýagny 33 ýaşly argentinaly oýunçy özüniň haýyr-sahawat gaznasy üçin Champion for Peace of the Year baýragyna eýe boldy. Bu barada sport24.ru habar berýär.
“Biz öz abraýyny jemgyýete uzak wagtlap täsir etmek hem-de has gowy we asuda dünýä ugrunda goşant goşmak üçin ulanýanlary hormatlaýarys. Messiniň meýdançada feýr-pleý babatdaky göreldesi we sosial goşantlary häzirki jemgyýete hakykatdanam täsir edýär diýip hasaplaýarys"-diýip, Halkara Olimpiýa komitetiniň agzasy Monakonyň şazadasy Albert II aýtdy.
“Messini "2020-nji ýylda Dünýä çempiony" bolmagy bilen gutlaýaryn! Lioneli özümiziň "Dünýä çempionlary" klubumyzda garşy almak meniň üçin uly hormat. Bu baýrak diňe bir onuň adalatly oýnamagyny, futbol meýdançasyndaky hormatyny we çydamlylygyny däl, eýsem, çagalaryň hukuklaryna ygrarlydygyny hem ykrar edýär. Bular ondan görelde alýanlar üçin gymmatlyklardyr we olar has adalatly jemgyýete tarap ýol açyp biler"-diýip, «Peace and Sport» guramasynyň esaslandyryjysy we Prezidenti Žoel Buzu aýtdy.
“Baýragy alanyma buýsanýaryn. Başgalara hormat goýmak çagalygymda öwrenen zadym we bu möhüm düşünjäni elmydama futbol meýdançasynda ulanmaga çalyşýaryn. Dogruçyl oýunçy hökmünde tanalmak gowy zat. Bu baýrak üçin dünýä, sporta we Monakonyň şazadasy Albert II-ä minnetdarlygymy bildirýärin hem-de pukaralary ruhlandyrmagy we goldaw bermegi dowam etmäge sabyrsyzlyk bilen garaşýaryn"-diýip, Messi belledi.