“Barselona” polşaly derwezeban Woýseh Şensny bilen täze şertnama baglaşdy. Bu barada klubuň resmi saýtynda habar berilýär. 35 ýaşly futbolçy bilen şertnama 2027-nji ýylyň 30-njy iýunyna çenli hereket edýär.
Şensny katalon toparyna 2024-nji ýylyň oktýabrynda – karýerasyny tamamlandygyny yglan edenden iki aý soň goşuldy. Klub tejribeli derwezebany esasy derwezeban Mark-Andre ter Ştegen şikes alandan soň çagyrdy.
Şensny geçeni bäri “Barselona” üçin 30 oýna gatnaşdy, olardan 14-üsinde gol geçirtdirmedi. Topar bilen bilelikde Ispaniýanyň çempionatyny, Kubogyny we Superkubogyny utdy.
Ozal polşaly derwezeban “Arsenalda”, “Brentfordda”, “Romada” we “Ýuwentusda” çykyş etdi. Polşanyň milli ýygyndysynyň düzüminde 84 oýunda oýnap, iki dünýä çempionatyna we dört Ýewropa çempionatyna gatnaşdy.
