«PSŽ» UEFA-nyň Çempionlar ligasynyň toparçalaýyn tapgyrynyň soňky aýlawynda türkleriň «Başakşehirini» 5-1 hasabynda ýeňdi. Duşuşyk aslynda sişenbe güni bolmalydy, ýöne ol jynsparazlyk dawasy sebäpli çarşenbe gününe yza süýşürildi.
Oýunda Neýmar 3 gol geçirip (21-nji, 38-nji we 50-nji minut) het-trik bilen, Kilian Mbappe bolsa iki gol geçirip (42 - penaltiden; 62) dubl bilen tapawutlandy. Türkleriň ýeke-täk goluny Mehmet Topal tora girizdi (57).
«PSŽ» - «Başakşehir» duşuşygynyň eminleri özleriniň jyns taýdan hukuk kemsitmelerine sezewar edilendigini aýtdylar. Sişenbe güni «Başakşehiriň» futbolçylary oýny dowam etdirmekden ýüz öwürdiler. Soňra oýun üçin eminleriň täze topary bellenildi.
21 ýaşly Mbappe Çempionlar ligasynyň taryhynda ýaryşda 20 gol geçiren iň ýaş oýunçy boldy.
«PSŽ» 12 utuk bilen «H» toparçada tapgyry birinji bolup tamamlap, Çempionlar ligasynyň pleý-offyna çykdy. 1/8 finala toparçada ikinji orunda ýerleşen «Leýpsig» (12 utuk) hem çykdy. «Mançester Ýunaýted» üçünji orny eýeläp (9), Ýewropa ligasynyň pleý-off tapgyryna ýollanma aldy. Toparda iň soňky orny «Başakşehir» eýeledi (3).