Ýaponiýanyň premýer ministri Ýosihide Suga iş sapary bilen ýurda gelen Halkara olimpiýa komitetiniň (HOK) başlygy Tomas Bah bilen gepleşik geçirdi diýip, Kyodo agentligi habar berýär. Muny sportrbc.ru ýetirýär.
“Bu duşuşykda biz geljek tomusda Ýaponiýada Olimpiýa we Paralimpiýa oýunlaryny geçirmek islegimiz we ynamymyz bilen doly ylalaşdyk” – diýip, Tomas Bah duşuşykdan soň aýtdy. Ol HOK-nyň “şol wagta çenli sanjym elýeterli bolsa” türgenlere sanjym edilmegi üçin ähli tagallalary etjekdigine wada berdi. “Bilelikde biz bu Olimpiýa oýunlaryny hem-de olimpiýa alawyny tuneliň ahyryndaky yşyk edip bileris” – diýip, ol sözüni jemledi.
Ýaponiýanyň premýer ministri öz gezeginde tomusky oýunlary “adamzadyň wirusy ýeňendiginiň subutnamasy” hökmünde geçirmegi ýüregine düwendigini aýtdy.
Tokioda tomusky Olimpiýa oýunlary şu ýyl 24-nji iýuldan 9-njy awgust aralygynda geçirilmelidi. Ýöne koronawirus pandemiýasy sebäpli 2021-nji ýylyň tomsuna süýşürildi. Indi ýaryşlar 2021-nji ýylyň 23-nji iýulyndan 8-nji awgust aralygynda geçirilmeli. Muňa garamazdan, Olimpiýa oýunlary “Tokio – 2020” adyny saklady.
