UEFA 2020-nji ýyldaky Ýewropa çempionatynyň formatyny üýtgetmegi göz öňünde tutýar diýip, “The Sun” neşiri habar berýär. Muny gazeta.ru ýetirýär. Koronawirus pandemiýasy sebäpli guramanyň Ýewropa çempionatynyň oýunlary geçiriljek şäherleriň sanawyny gysgaltmagy ähtimal.
Halys petige dirän halatynda, turnir dört meýdançany ulanmak bilen bir ýurtda geçirilip bilner. Üýtgeşmeleriň maksady pandemiýa döwründe gatnawlaryň sanyny azaltmakdan ybarat.
Sanawdan aýrylmagy mümkin hasaplanylýan şäherler Baku we Sankt-Peterburg bolup biler.
Ýatlap geçsek, futbol boýunça Ýewropa çempionaty 2020-nji ýylyň 12-nji iýunyndan 12-nji iýuly aralygynda geçirilmelidi, ýöne koronawirus pandemiýasy sebäpli turnir indiki ýyla süýşürildi. Ýaryşlaryň täze senesi – 2021-nji ýylyň 11-nji iýunyndan 11-nji iýuly aralygynda. UEFA turniriň adyny üýtgetmezlik kararyna geldi. Ilkibaşda turnir 12 şäherde geçirilmeli edilipdi: Sankt-Peterburg, London, Mýunhen, Baku, Rim, Buharest, Kopengagen, Amsterdam, Bilbao, Glazgo, Budapeşt we Dublin.