“Gazprom”, “Tatneft”, “Wozroždeniýe” ýaly kompaniýalara wekilçilik edýän 30 sany rus hünärmeninden ybarat topar sişenbe güni - 25-nji awgustda Moskwadan S7 çarter uçuşy bilen Türkmenabat şäherine geldi. Olar rus kärdeşleriniň gatnaşýan dürli desgalarynda wahtany çalşarlar. Bu, elbetde, ýurda gelýänleriň hemmesi üçin hökmany bolan iki hepdelik karantinden soň bolar.
Pandemiýa ýurtlaryň ykdysady gatnaşyklaryny, halkara işewür gatnaşyklaryny haýallatdy we çylşyrymlaşdyrdy, ýöne welin bütinleý ýatyrmady. Wirtual diplomatiýa we onlaýn gepleşikler köp derwaýys meseleleri çözmäge kömek edýär, ýöne fiziki işiň ýerini tutmaýar. Şeýle bolansoň, indi, ýagny dünýäde täze koronawirusyň pandemiýasy barha gowşap, döwletler serhetlerini kem-kemden açyp başlanda, işewür hyzmatdaşlar ýitirilen wagtyň öwezini dolmaga çalyşýarlar.
Ýangyç-energetika toplumy, ulag, senagat Türkmenistanyň ykdysadyýetiniň esasy pudaklary bolup, olarda hyzmatdaşlygy dowam etdirmegi türkmen kärdeşlerinden az islemeýän daşary ýurt kompaniýalarynyň gatnaşmagynda iri maýa goýum taslamalary amala aşyrylýar.
Şonuň üçin eýýäm ýakyn wagtda uçuş çäklendirmeleriniň döwründe ýurduň esasy howa merkezine öwrülen Türkmenabat halkara howa menzili nobatdaky myhmanlaryny garşylar. Bu gezekki myhmanlar Ukrainanyň nebit we gaz pudagynyň hünärmenleri bolar.
ORIENT-iň berýän maglumatlaryna görä, Türkmenabat şäherine gelýän ukrain kompaniýalarynyň işgärleri derrew deňiz kenaryndaky Türkmenbaşy şäherine äkidiler we iki hepdelik karantin lukmançylyk gözegçiligini şol ýerde geçirer. Soňra degişli lukmançylyk rugsadyndan soň işe girişerler.