Amerikan söweşijisi Stipe Mioçiç öz ildeşi Daniel Kormýeni ýeňip, Absolýut söweş çempionatynda (UFC) agyr agramda çempionlyk derejesini saklap galdy. Tutluşyk Las Wegasda (Newada, ABŞ) UFC 252 ýaryşynyň çäginde geçirildi. Bu barada TASS habar berýär.
Mioçiç eminleriň biragyzdan gelen karary bilen ýeňiş gazandy. 37 ýaşly söweşiji garyşyk söweş sungatynda (MMA) 23 söweş geçirdi: şolaryň 20-si ýeňiş we 3-si ýeňliş. 41 ýaşly Kormýeniň hasabynda bolsa 22 ýeňiş bilen üç ýeňliş bar.
Bu söweş Kormýe bilen Mioçiçiň arasyndaky üçünji duşuşykdyr. 2018-nji ýylyň iýul aýynda bolup geçen birinji söweşde Kormýe nokaut bilen ýeňiş gazandy. 2019-njy ýylyň awgust aýynda geçirilen ikinji söweşde bolsa Mioçiç tehniki nokaut bilen garşydaşyndan üstün çykypdy.