Fransiýanyň «Pari Sen-Žermen» toparynyň we Gruziýanyň milli ýygyndysynyň wingeri Hwiça Kwarasheliýa Çempionlar ligasynda möwsümiň iň gowy oýunçysyna berilýän baýragyň eýesi boldy. Bu barada Ýewropanyň Futbol Assosiasiýalarynyň Birleşiginiň (UEFA) resmi sahypasynda habar berilýär.
Şenbe güni Budapeştde geçirilen Çempionlar ligasynyň final duşuşygynda «Pari Sen-Žermen» Angliýanyň «Arsenal» toparyny utmagy başardy (esasy wagt 1:1, penalti boýunça 4:3) we yzygiderli ikinji ýyl bu ýaryşyň ýeňijisi boldy. Kwarasheliýa oýunda hasap 0:1 wagty penalti gazandy we ony fransiýaly hüjümçi Usman Dembele üstünlikli ýerine ýetirdi.
Tamamlanan Çempionlar ligasynyň möwsüminde Kwarasheliýa jemi 16 duşuşyga gatnaşyp, 10 gol geçirdi hem-de 6 assist etdi.
Kwarasheliýa 25 ýaşynda bolup, ol «PSŽ» topary bilen Fransiýanyň iki gezek çempiony boldy, ýurduň Kubogyny we Superkubogyny gazandy, iki gezek Çempionlar ligasynyň, şeýle hem bir gezek UEFA-nyň Superkubogynyň we Yklymara kubogyň eýesi boldy.
Kwarasheliýa Kazanyň «Rubin» we Moskwanyň «Lokomotiw» toparlarynda hem çykyş edip, «Lokomotiw» bilen 2018/19 möwsüminde Russiýanyň Kubogyny gazandy. Mundan başga-da, Kwarasheliýa «Napoli» topary bilen Italiýanyň çempiony boldy.
