Londonynyň «Tottenhem Hotspur» futbol kluby Roberto De Dzerbininiň baş tälimçi wezipesine bellenendigini yglan etdi. Klub italiýaly hünärmen bilen baglaşylan şertnamanyň «uzak möhletleýin» häsiýete eýedigini habar berdi.
Köpçülikleýin habar beriş serişdeleriniň maglumatyna görä, ylalaşyk bäş ýyl möhlet bilen baglaşyldy we onda toparyň Angliýanyň Premýer-ligasyndan aşaky liga düşen ýagdaýynda şertnamany möhletinden öň ýatyrmak baradaky bölek goşulmady.
«Men şu ajaýyp futbol klubuna goşulýandygymdan örän şat... maksatlara ýetmek üçin bar güýjümi sarp ederin» diýip, De Dzerbi aýtdy.
De Dzerbi bu wezipede 44 günüň dowamynda klubda işlän horwatiýaly Igor Tudoryň ornuna geçdi. Tudoryň ýolbaşçylygynda topar ýedi duşuşyk geçirip, diňe bir gezek ýeňiş gazandy. Maglumatlara görä, Tudor öwez tölegini almazdan kluby terk etdi. Bir ýylyň içinde klub eýýäm üç tälimçini işden boşatdy.
Italiýaly hünärmen De Dzerbi 46 ýaşynda. Ol soňky gezek 2024-nji ýylyň iýunyndan 2026-njy ýylyň fewralyna çenli «Marsel» toparynda işledi. Onuň ýolbaşçylygynda topar Fransiýanyň çempionatynda ikinji orny eýeledi. Habar berilmegine görä, ol ýewrokuboklardaky we milli çempionatdaky şowsuzlyklardan soň, öz islegi bilen wezipesinden gitmek barada karar kabul etdi.
Mundan ozal De Dzerbi «Sassuolo», Doneskiň «Şahtýory» we «Braýton» ýaly toparlara tälim beripdi. Ol Angliýada «Braýton» klubuna taryhyndaky iň gowy netijäni gazanmaga we ýewrokuboklara çykmaga kömek etdi.
APL-iň 31-nji tapgyryndan soň «Tottenhem» 30 utuk toplap, ýaryş jedwelinde 17-nji orny eýeleýär. Topar indiki duşuşygyny 12-nji aprelde «Sanderlend» toparyna garşy geçirer.
