«Barselona» futbol kluby Ýewropanyň Superligasy taslamasyndan çykýandygyny resmi taýdan yglan etdi. Bu çözgütden soň, Madridiň «Realy» taslama gatnaşmagyny resmi dowam etdirýän ýeke-täk klub bolup galdy.
Superliganyň döredilýändigi barada 2021-nji ýylyň ýazynda yglan edilipdi. Ony öňe sürenler hökmünde Ýewropanyň öňdebaryjy 12 kluby çykyş etdi, ýaryşyň özi bolsa häzirki yklym ýaryşlaryna alternatiwa hökmünde görkezildi. UEFA bu taslama dessine garşylyk bildirip, sanksiýalar bilen haýbat atdy. Netijede, esaslandyryjy klublaryň köpüsi iki günüň içinde Superligany terk etdi.
Häzirki wagta çenli taslamanyň agzalary hökmünde diňe «Barselona» we «Real» hasaplanylýardy. Turiniň «Ýuwentus» topary 2023-nji ýylyň iýunynda ondan çykdy. Soňra galan klublar A22 Sports Management kompaniýasyny döredip, UEFA bilen kazyýet arkaly çözülişmäge başlady.
2024-nji ýylyň dekabrynda taslamanyň ady Unify League diýlip üýtgedildi. 2025-nji ýylyň oktýabrynda Madridiň kazyýeti UEFA-nyň erkin bäsdeşlik düzgünlerini bozandygyny tassyklady. «Real» bolsa guramadan 4,5 milliard ýewro möçberinde öwez tölegini talap etmekçidigini aýtdy.
«Barselona» dört ýyldan soň Superligadan çykyp, «Realy» ýeke galdyrdy
- 09.02.2026 00:09
- 8.7k+
