“Inter Maýami” futbol kluby Major League Soccer (MLS) Kubogyny gazandy. Ol finalda “Wankuwer Uaýkepsi” utdy. Florida ştatynyň “Fort-Loderdeýl” şäherinde geçirilen duşuşyk Maýami toparynyň peýdasyna 3:1 hasabynda tamamlandy.
“Inter Maýami” 8-nji minutda goragçy Edier Okamponyň awtogoly netijesinde hasaby açdy. “Wankuweriň” oýunçylary oýnuň diňe ikinji ýarymynda hasaby deňlemegi başardy – Ali Ahmed gol geçirdi (60-njy minut).
“Inter Maýaminiň” ýeňiş gazanmagyna argentinaly oýunçylaryň – Rodrigo De Paulyň (71-nji minut) we Tadeo Alendeniň gollary (90+6) kömek etdi. Gollaryň ikisi-de toparyň kapitany Lionel Messiniň assist etmegi bilen geçirildi. “Altyn topuň” sekiz gezek eýesi dokuz assist bilen pleý-offuň iň gowy assistenti boldy.
Bu ýeňiş “Inter Maýami” üçin taryhy boldy, çünki klub 2018-nji ýylda döredileni bäri we 2020-nji ýylda ligada çykyş edip başlany bäri ilkinji gezek MLS-iň çempiony boldy.
Messi üçin bu kubok professional karýerasynda 48-nji boldy – ol titul sany boýunça absolýut rekord eýesidir. Klub bolsa döredileni bäri dördünji kubogyny gazandy.
Belläp geçsek, bu oýun titully iki ispan futbolçysy – Žordi Alba we Serhio Buskets üçin karýerasynda soňky oýun boldy.
Major League Soccer ABŞ-da we Kanadada professional futbolyň ýokary diwizionydyr.
Ýaryş iki tapgyrda geçirilýär. Ilki liganyň Gündogar we Günbatar konferensiýa bölnen toparlary yzygiderli möwsümiň oýunlaryny oýnaýar. Öz konferensiýalarynda ýokary orunlary eýelän toparlar pleý-off tapgyryna çykýar. Bu tapgyr “utulan çykdy” oýunlaryndan ybarat bolup, ýeňiji Olimpiýa ulgamy boýunça kesgitlenýär.
Gündogar (“Inter Maýami”) we Günbatar (“Wankuwer Uaýtkeps”) konferensiýalaryň pleý-offunda ýeňiji bolan iki topar MLS Kubogy (MLS Cup) adyny göterýän final oýnunda duşuşýar. Bu oýnuň ýeňijisi liganyň çempiony diýlip yglan edilýär.
Şeýlelikde, “Inter Maýami” diňe bir ligany däl, eýsem möwsümiň ahyrynda final oýnunda berilýän esasy kubogy utdy.
