Hindistanyň demirgazyk bölegindäki güýçli ýagyşlar suw joşgunlaryna we sil akymlaryna getirdi. Uttarakhand ştatynda Dharali dag obasy bütinleý diýen ýaly weýran boldy. India Today-iň maglumatlaryna görä, azyndan dört adam heläk boldy, 50-den gowrak adam dereksiz ýitdi diýlip hasaplanýar.
Tebigy betbagtçylyk 5-nji awgustda suwuň Khir-Ganga derýasyna akýan ýerinde güýçli çabgadan soň bolup geçdi. Derýa kenardan çykdy we ýerli wagt bilen 13:45-de oba sil akymy geldi. Wideo ýazgylarynda batly suwuň öýleri we dükanlary ýumrup, öz yzyndan galyndy topbaklaryny galdyrýandygy görünýär.
Deslapky maglumatlara görä, 20 – 25 myhmanhana we myhman jaýlary ýykyldy. Harabalygyň aşagynda 12 adama çenli bolup biler. Halas ediş işleri dowam edýän ýagyşlar we zeper ýeten ýollar sebäpli kynlaşýar.
Güýçli ygallar Hindistanyň beýleki demirgazyk ştatlaryna-da täsir etdi. Käbir sebitlerde Gang derýasy kenardan çykyp, müňlerçe öýi suw basdy. Ýerli häkimiýetler ýaşaýjylary derýalara barmakdan saklanmaga we seresaplylygy berjaý etmäge çagyrýar. Meteorologlaryň çaklamasy boýunça, bu sebitde ýagyşlar 10-njy awgusta çenli dowam edip biler.
