Horwatiýaly ýarymgoragçy Luka Modriç resmi taýdan “Milanyň” oýunçysy boldy. 14-nji iýulda ol lukmançylyk barlagyndan geçip, italýan kluby bilen bir ýyllyk şertnama baglaşdy. Şertnamada ýene bir möwsüm uzaltmak mümkinçiligi hem göz öňünde tutulýar.
39 ýaşly futbolçy Madridiň “Realy” bilen şertnamasynyň möhleti tamamlanandan soň, italýan klubuna erkin agent hökmünde goşuldy. Ol “Realda” 2012-nji ýyldan bäri çykyş edipdi.
Modriç bu klubuň düzüminde geçiren 13 möwsüminiň dowamynda 28 kubok, şol sanda alty Çempionlar ligasyny utdy. Ol klubuň taryhynda iň köp titula eýe bolan oýunçy boldy.
La Gazzetta dello Sport neşiriniň habar bermegine görä, Modriçiň “Milanda” zähmet haky bir möwsüm üçin 3 – 3,5 mln ýewro bolar.
2018-nji ýylda Modriç ýylyň iň gowy futbolçysy hökmünde “Altyn topuň” eýesi boldy.
