Ansu Fati “Barselona” bilen şertnamasyny 2028-nji ýylyň tomsuna çenli uzaltdy. Bu barada katalon klubunyň resmi saýtynda habar berilýär. Täze şertnama gol çekilenden soň, 22 ýaşly hüjümçi “Monako” kärendesine berildi. Fransuz kluby oýunçyny bir möwsümlik aldy.
Žurnalist Fabrisio Romanonyň maglumatlaryna görä, klublaryň arasyndaky şertnamada satyn almak mümkinçiligi hem göz öňünde tutulan. “Monako” oýunçyny 11 mln ýewro satyn alyp biler.
Ispaniýaly winger fransuz toparynyň tomusda alan üçünji täze oýunçysy boldy. Ozal bu topara goragçy Erik Daýer we ýarymgoragçy Pol Pogba goşuldy.
Fati “La Masiýanyň” ýetişdiren oýunçysydyr. Ol “Barselonanyň” esasy düzümi üçin ilkinji gezek 2019-njy ýylyň 25-nji awgustynda 16 ýaşynda çykyş etdi. Şol ýylyň 10-njy dekabrynda Çempionlar ligasynyň taryhynda iň ýaş gol awtory boldy. Ol “Intere” ýeňiş goluny geçirdi (2:1). Şol wagt ol 17 ýyl 40 gün ýaşyndady.
Umuman alanyňda, Fati “Barselona” üçin 123 oýna gatnaşyp, 29 gol geçirdi we 8 assist etdi. Onuň hasabynda Ispaniýanyň iki çempionlygy (2023, 2025), ýurduň iki Kubogy (2021, 2025) we iki Superkubogy (2023, 2025) bar.
2023/2024 möwsüminde futbolçy Angliýanyň “Braýton” klubunda kärendesinde bolup, 27 oýna gatnaşdy (4 gol, 1 assist). 2020-nji ýylda Ispaniýanyň milli ýygyndysy üçin ilkinji gezek oýnady. 2022-nji ýylyň dünýä çempionatyna gatnaşdy we 2023-nji ýylda Milletler ligasynyň ýeňijisi boldy.
