Stambulyň “Galatasaraý” futbol kluby 25-nji gezek Türkiýäniň çempiony titulyny gazandy. Topar möwsümiň gutarmagyna iki tapgyr galanda birinji orny üpjün etdi.
Türkiýäniň Superligasynyň 36-njy tapgyrynda “ýolbarslar” öz meýdançasynda “Bellona Kaýserispory” 3:0 hasabynda utdy. Bu netije kluba ýakyn bäsdeşi “Fenerbahçeden” sekiz utuk öňe geçip, möhletinden ir çempionlygy gazanmaga mümkinçilik berdi.
Oýundan soň “Galatasaraýyň” futbolçylary stadionda simwoliki ýeňiş aýlawyny ýerine ýetirdi.
Toparyň baş tälimçisi Okan Buruk bolup, onuň ýolbaşçylygynda “Galatasaraý” yzygider üçünji gezek Superligany utdy.
Bu möwsümde ýeňiş klubuň taryhynda 25-nji boldy. Düzgüne görä, her bäşinji titul toparyň nyşanyna bir ýyldyz goşmaga mümkinçilik berýär. Şeýlelikde, “Galatasaraý” öz nyşanynda bäş ýyldyz götermäge hukuk gazanan Türkiýäniň ilkinji kluby boldy.
Çempionlygyň sany boýunça “Galatasaraý” türk klublarynyň arasynda öňdebaryjydyr. “Fenerbahçede” – 19 titul, “Beşiktaşda” – 16. “Trabzonspor” çempionaty 7 gezek, “Bursaspor” we “Istanbul Başakşehir” bir gezek utdy.
Bu möwsümde klub “altyn dubl” gazandy. Geçen hepde “Galatasaraý” Türkiýäniň Kubogyny gazandy, ol finalda “Trabzonspory” 3:0 hasabynda utdy.
2025-2026-njy ýyl möwsüminde “Galatasaraý” UEFA-nyň Çempionlar ligasynda gönüden-göni çykyş eder.
