Londonyň “Arsenaly” Çempionlar ligasynyň myhmançylykdaky oýnunda ýedi gol geçiren Angliýanyň premýer-ligasynyň ilkinji kluby boldy. Çempionlar ligasynyň 1/8 finalynyň birinji oýnunda topar “PSW Eýndhoweni” 7:1 hasabynda uly ýeňlişe sezewar etdi. Esasy Ýewropa ýaryşynda myhmançylykda şeýle köp goly iňlis klublarynyň hiç biri geçirmändi diýip, Squawka belleýär.
“Arsenal” üçin Martin Edegor iki gol geçirdi, Ýurrien Timberiň, Itan Nwaneriniň, Mikel Merinonyň, Leandro Trossaryň we Rikkardo Kalafýoriniň her biriniň hasabynda bir gol bar. “PSW-de” Noa Lang penaltiden tapawutlandy.
Agşamyň esasy oýnunda Madrid garşydaşlygynda “Real” sähel tapawut bilen “Atletikony” utdy – 2:1. Hasaby 4-nji minutda Rodrigo açdy. 32-nji minutda Hulian Alwares hasaby deňledi, ýöne 55-nji minutda Braim Dias “Realyň” ýeňiş goluny geçirdi.
Angliýanyň ýene bir wekili “Aston Willa” myhmançylykda Belgiýanyň “Brýuggesini” 3:1 hasabynda utdy. Topara ýeňşi Leon Beýliniň, Marko Asensionyň gollary we Brandon Meheleniň awtogoly getirdi. Utulan topardan Maksim De Keýper tapawutlandy.
Beýleki bir oýunda Dortmundyň “Borussiýasy” öýünde “Lill” bilen deňme-deň oýnady – 1:1. Karim Adeýeminiň goluna myhmanlar Haakon-Arnar Haraldssonyň takyk urgusy bilen jogap berdi.
Bu toparlaryň arasyndaky jogap oýunlary 12-nji martda geçiriler.
