Kaliforniýada Ferrari stilinde ýasalan seýrek trenažýor toplumy satuwa çykaryldy. The Drive neşiriniň habaryna görä, bu enjam aslynda 2007-nji ýylda italýan Technogym kompaniýasy tarapyndan işlenip taýýarlanylypdyr.
Başda bu trenažýoryň bahasy 17 müň dollardan geçýärdi. Häzir bolsa ony 16 müň 999 dollara satmak isleýärler. Ferrari nyşanlary bolmadyk şuňa meňzeş enjamlary bolsa has arzan bahadan satyn alyp bolýar.
Trenažýoryň dizaýny Maranellodaky superkarlaryň stillerine meňzedilipdir. Metal bölekleri Ferrari üçin mahsus bolan gyzyl reňke boýalyp, käbirleri bolsa hrom bilen örtülipdir. Ýumşak ýerleri bolsa krem reňkli deri bilen örtülipdir. Onuň käbir jikme-jikleri hem awtoulaglardan ylham alypdyr, meselem, ýükleme güýjüni sazlaýan tutawaç mehaniki karobkanyň geçiriji tigrine meňzedilipdir.
Bu trenažýor toplumy 2000-nji ýyllarda örän tehnologik hasap edilýärdi. Ol açar-karta bilen enjamlaşdyrylyp, ulanyjynyň türgenleşik maglumatlaryny saklamaga mümkinçilik berýär. Şeýle hem enjamyň içine ornaşdyrylan kompýuter bar, ol türgenleşik maglumatlaryny seljerip, kişiniň aýratyn aýratynlyklaryna görä şahsy türgenleşik meýilnamalaryny hödürleýär.
