Hindistanyň günorta ştaty Kerala 2025-nji ýylda Argentinanyň milli toparynyň gatnaşmagy bilen geçiriljek halkara futbol oýnuny kabul eder. Bu barada ştatyň sport ministri Wi Abdurahiman habar berdi.
Ol Argentinanyň milli ýygyndysynyň geljek senesini aýtmady, ýöne oýny guramak üçin çykdajylary ýerli telekeçiligiň öz üstüne aljakdygyny habar berdi. “Bu dabaraly futbol wakasyny gurnamak üçin ähli maliýe kömegi ştatyň söwda toparlary tarapyndan üpjün ediler” – diýip, Abdurahiman belledi.
Keralanyň baş ministri Pinaraýi Wijaýan Argentinanyň milli ýygyndysynyň geljek ýyl ştata gelmeginiň mümkindigini tassyklady. “Kerala taryha girmekçi, sebäbi geljek ýyl bu ýere futbol boýunça dünýä çempionlarynyň – Argentinanyň gelmegine garaşylýar. Bu arzuw ştatyň hökümetiniň tagallalary we Argentinanyň milli futbol ýygyndysynyň goldawy bilen hakykara öwrülýär” – diýip, ol X sosial ulgamyndaky sahypasynda ýazdy. Ol ştatyň ýaşaýjylaryny belli futbolçylar bilen duşuşyga taýýarlanmaga çagyrdy.
Argentinanyň milli ýygyndysy üç gezek dünýä çempionydyr, soňky gezek ol 2022-nji ýylda geçirilen dünýä çempionatynda ýeňiş gazandy. Milli ýygyndynyň kapitany Lionel Messi bolsa “Altyn top” baýragynyň sekiz gezek eýesidir.
